Show di Bola

Tubaron Azul sta na Purtugal pa stágiu pa djogu di pa trisera jornada di grupu D di kualifikason pa Mundial 2026

Sileson Nasional di Kabu Verdi, kontinua na Purtugal preparativu pa djogu des sábadu, dia 8, ku Kamoron, pa konta pa trisera jornada di grupu D di kualifikason pa Mundial 2026.

D´akordu ku Federason Kabu-verdiana di Futebol (FCF), Piku i Patrick Andrade ta prisenta nes kuarta fera, dia 5, na Sintra undi sta sileson nasional.

Komandadu pa silesionador nasional Bubista, Tubaron Azul ta djuga dia 8, pa 2 hora tardi ku Kamoron na stádiu Ahmadou Aido, na Yaoundé, i, 3 dia dipos dia 11 di junhu, nu ta resebi na Stádiu Nasional, na Praia, Líbia pa 3 hora tardi.

Grupu d ê lideradu pa Kamarões, Líbia i Kabu Verdi tudu ku 4 pontu kada, seguidu pa Angola ki teni 2 pontu, Ilhas Maurícias 1 pontu i Etswatini ku 0 pontu.

Kes 2 partida ê di 3º i 4º jornada di grupu D di kualifikason pa Mundial di 2026 ki ta kontisi na Kanadá, Merka i Méxiku i ta konta, pa prumeru bez, ku 48 sileson.

Kes 54 pais afrikanu divididu na 9 grupu di 6 sileson (grupu A ti I) i vensedor di kada grupu ta kualifika otomatikamenti pa Mundial 2026.

Kes 4 midjor sugundu lugar ta disputa final-four undi ta desididu ekipa ki ta representa Áfrika num respeskagem interkontinental, ki podi omenta pa 10 numbru di páis afrikanu na mundial.