Show di Bola

Djogu Olímpiku 2024 ta kumesa oji ku Kabu Verdi representadu pa 7 atletas

Pa prumeru bez na stória di djogu olimpiku di veron, serimônia d´abertura ka ta kontisi num stádiu. Paris 2024 ta trazi disportu pa sidadi i mesmu kusa ta kontisi ku serimôia d´abertura ki ta kontisi na sentru di sidadi na vinida di Riu Sena.

Disfili di atletas ta kontisi na Riu Sena ku barku pa kada delegason nasional. Kes barku ta ser ekipadu ku kâmera pa pirmiti ki públiku kumpanha i odja atletas di pertu na telivison ô online. 10 mil i 500 atletas ta representa 206 komite ta kruza sentru di Paris, ki sa bai ser kampu geral di tudu eventu, undi atletas ta kompiti duranti 16 dia. Disfili ta termina frenti Trocadéro, undi ta kontisi otus eventos i ultimu shows d´abertura.

Serimonia ê abertu pa públiku, ku entrada di grasa. 80 telon i alto falanti distribuidu strategikamenti pa tudu kapital fransesa. Keli ta ser maior abertura di djogu olimpiku na stória.

Atletas ta ser korason i alma di serimônia, undi ta kebradu tradison, atletas ta prisentadu na palku na kumesu i duranti serimônia, kela ê parti di objetivu di Paris 2024 ki ta realiza djogu kriadu pa atletas.
Kabu Verdi ta sta representadu na Djogu Olimpiku Paris 2024.

Team Kabu Verdi ê formadu pa 7 atletas: Samuel Freire (meia-maratona), Jayla Pina i José Tati (natason), Nancy Moreira e David Pina (boxe), Victor Alvares d’Oliveira (esgrima) e Djamila Correia e Silva (judo).

Dilegason ê formadu pa 26 elimentu, 7 atleta, 6 ofisial di ekipa, xefi di misson, 1 mediku, fisioterapeuta, 1 priparador físiku, un psikolu i responsavel di coc.

Keli ê maior delegason di sempre di Kabu Verdi na djogu olimpiku.