Show di Bola

Konsequênsia di Covid-19: Djá kanseladu Open di Kabu Vêrdi di Xadrez, sima ôtus eventu internasiunal

Fedrasôn Kabu-verdiana di Xadrez djá cancela Open di Kabu Verdi di mudalidadi pa respondi solisitasôn di Guvérnu fêtu na Planu di Contingência sobri Covid-19, pa evita djunta munti alguém num úniku spasu.

Kumpitisôn, ki ta involvi partsipasôrn di djugadôr e árbitru internasiunal, staba markadu pa kuntisi di 25 d’ Abril ti 1 di Maio e góssi Fedrasôn stá analiza um novu data pa si rializasôn.

Lá fora
Confederasôn Afrikana di Futiból stá prevê porta fitxadu, kanselamentu e adiamentu di djogu konformi país envolvidu, na kumpitisôn afrikanu pa evita djunta munti alguém num spásu fitxadu pa ká propaga duença.

Organismu ki ta giri futiból afrikanu djá kria um ikipa kompostu pa diferenti espisialista, prinsipalmenti médiku, pa stá vigilanti em relação a pandemia di novu Coronavirus pês podi stá priparadu pa tôma midida certu.

Fedrasôn Internasiunal di Basketbol tambê djá anunsia suspensôn di tudu sês kumpitisôn a partir di manhãn.

Fedrasôn ta justifika midida ku protesôn di saúdi e sugurança di djugadôr, treinadôr, árbitru e adeptu pamódi pandemia di Covid-19.

Liga italiana di futibol suspêndi tudu djogu di Série A. Ês adiadu mas inda sem data certu. Disisôn surgi dipôs ki Giuseppe Conte, 1º ministru italianu, ordêna estadu di quarentena pa país intéru pamodi surtu di Coronavírus.

Tambê pamodi doença kês próximu dôs djogu di silesõn francês di fitiból ta ser disputadu ku porta fitxadu. Djogu ê di priparasôn pa Euro-2020.