Show Bizz

Celina Pereira: Mas di 40 anu di karrera ta inspira novu gerason di artista kabu-verdianu

Morri onti na Portugal Celina Pereira, dipos dum tempu ta luta kontra um duensa prolongadu.

kábu – verdiána Celina Pereira konxêdu pa sis Lundum, Mazurka, Mórna e Kantiga di Róda tinha 80 anu di idade.. kantôra ê natural di Boa Vista má ê bai pikinóti pa Son Visênti undi ê kumêsa ta kánta ku 5 ánu e a partir di 8 ánu ê ta fazêba párti di kóru n´igrêja. Celina rivêla kómu kantôra na grupu Ritmos Cabo verdianos n´ánus 60. na kel témpu ê fazi suséssu ku músika Ave Maria no Morro.

Celina Pereira ê prussóra di formason e ê ta dividi na munti atividádi di idukason na skóla e ta kônta stória tradisiunal. n´ánus 70 ê bai pa Lisboa e é ta vivêba kómu kantôra e jornalista. na 1979 ê lánsa si 1º disku ku mórna Bubista Nha Terra. Na 1985 ê partisipa na Fistival di Voz Fimininu na Práia e risultádu foi lansaméntu di disku Mar Azul djuntu ku ôtus partisipánti.

Na 1986, Celina Pereira lánsa um LP ku nómi Força di Cretcheu e na si karrêra é lansa áudiu – livru sima: Estória, Estória…Do Tambor A Bulimundo Volumi 2 e Estória, Estória…No Arquieplágo das Maravilhas e inda disku: De Lá Pra Cá, Harpejos e Gorgeios e Nôs Tradição. Kantôra kábu – verdiána ki ta viveba na Purtugal risêbi si 1º prémiu internasiunal na 1991, na Itália. Celina Pereira també foi Prémiu Karrera na 4ª Gala di Cabo Verde Music Awards.

Na 2003 ê foi kondekoradu, pa prisidênti di repúblika purtuguês Jorge Sampaio, ku Midalha di Méritu, pa si trabadju na ária di idukasôn e kultura.