Show di Bola

Priparasôn pa Afrobasket 2025: Silesionadôr Nasiunal djá divulga lista di djugadôr ki ta entra kampu sexta-fêra

Silesionadôr nasiunal, Emanuel Trovoada djá divulga lista di konvokadus pa próximus djogu di Qualifikasôn pa Afrobasket 2025.

Pruméru partida ê kontra Uganda, ess sexta-fêra li na Tunísia, e kelotu ê dôs dia dispôs kontra Nigéria.
Na lista di kês 13 konvokadu, Trovoada pratikamenti manti bazi di djugadôr ki stevi na mundial di Ásia. Distaki ta bai pa inklusôn di Edy Tavares.

Fika di fora: Ivan Almeida e Keven Gomes, ki opêra ess simana, e tambê Kony ku Wiliam Tavares ki sta lesionadu.

Kês bazi ê: Shane da Rosa, ki sta bem di Piratas di Merka, Amin Delgado, ki ta djuga na Spanha, Hugo Pereira di Queluz – Purtugal e Patrick Lima di Almeria, di Spanha.

Kês extremu txomadu ê: Joel Almeida di CAP – Camarões, Anderson Correia di Petro di Luanda, Patrick Spencer di Zentro Basket Madrid di Spanha, Marcus Santos Silva di Lille – França e Victor Andrade di Almansa, di Spanha.

Na pusisôn 4 e 5 txomadu: Edy Walter Tavares di Real Madrid, di Spanha, Keneth Mendes di Providense, Betinho Gomes di Benfica di Purtugal e Amarilson Lopes di Maguei di Spanha.