Info Praia

Grito Rock Praia 2019: Ta ranka oji eventu ki ta retrata músika alternativa na Kabu Vêrdi

Ta rankla oji sétimu idisôn di di Fistival Internasiunal Grito Rock Praia ku nobidadi dêss idisôn kê Grito Cordas – um show di guitarra akústiku pa mostra habilidade di músikus kabu-verdianu.

Grito Cordas ta kuntisi na Centru Cultural Purtuguês ku partsipasôn di Tó tavares, Quim Bettencourt, Zé Rui de Pina, Manel di Candinho, Kaká Barbosa, Djick Oliveira e Alícia Maria, um mininu di skola di músika Pentagrama.

Pa manhãn (21) stá programadu Mini-Grito – um festival di banda infantil e di criança di skola di músika. Atividadi stá markadu pa 3 óra tardi na Skóla SOS ku partsipasôn di alunos di Skóla Pentagrama. Gota d’Arte, Mira Flores e Palhaço Paçocas.

Dia siguinti tem Grito Encontro ku artistas ki sta partsipa na Fistival Grito Rock Praia – keli ê pontu altu d’eventu e ê stá programadu pa kuntisi dia 23,Sábadu, na Pracinha Skóla Grandi ku atuasôn di banda WS Family, RockdIlhas, Primitive, Blackside, Lazywall di Marrocos e Galiot Band di Spánha.

Ti dia 27 dêss mês ta atua sáis banda – 4 nasiunal e 2 strangêru – tambê stá previstu tertúlia, inkontru, jam session e interkambiu.

Eventu ki êss anu t’omenagia artista Kaká Barbosa stá orçadu na três mil kontu.